News

Iscriziuns al curs de formaziun por l'abilitaziun da insigné nü

Le pröm curs de formaziun por arjunje l'abilitaziun da insigné tles scores secundares de sort statala metará man da d'altonn. Les iscriziuns é davertes.

Le curs de formaziun por l'abilitaziun da insigné por les scores secundares nü é gnü istituí aladô dla deliberaziun dla Junta provinziala n. 206 di 24 de merz dl 2020. Le model de formaziun é gnü svilupé dala Direziun Istruziun y Formaziun todëscia y dal'Intendënza ladinia deboriada cun la Facolté de sciënzes dla formaziun dl'Université Lëdia de Balsan y se conzentrëia sön le coliamënt danter teoria y pratica.

Tres le curs vëgnel integré i 24 credic statai preodüs ti ciamps pedagogia/didatica, psicologia y metodica che vel sciöche recuisic d'amisciun por podëi tó pert ai cursc d'abilitaziun al insegnamënt o a concursc. La formaziun tëgn cunt dles particolarités dla scora dl Südtirol. Implü vëgnel odü danfora n acompagnamënt che tëgn pro tratan döt le tëmp de formaziun che döra dui agn. Le curs de formaziun vëgn tigní vigni trëi agn por dötes les categories de concurs cun posć lëdi y a desposiziun.

Les candidates y i candidac ladins pó ti mené les domandes d'amisciun a chësc curs de formaziun al'Intendënza y Cultura ladinia cina en mertesc, ai 5 de ma dl 2020.

Informaziuns plü avisa sön la prozedöra d'iscriziun, sön vigni classa de concurs sciöche ince sön la strotöra dl curs vëgn dades te na zircolara aposta dla Direziun provinziala dles Scolines y scores ladines (zircolara n. 6 di 03.04.2020) y sará ti proscimi dis ince da ciafé online tla seziun "Personal dirigënt y insegnant" dla plata internet dla scora ladina. D'atres informaziuns é da ciafé sön la plata internet dla Facolté de sciënzes dla formaziun dl'Université Lëdia de Balsan.

 

USP/USP