News

Formaziun dles classes y numer di posć fissé por le 20/21 cina al 2022

La Junta provinziala á fissé incö le cheder dla formaziun dles classes y dl numer di posć dla scora elementara, mesana y alta por i proscimi trëi agn.

La Junta provinziala á stabilí la formaziun dles classes y numer di posc fissé por le 20/21 cina al 2022/23 (Foto: Taylor Wilcox/Unsplash)

Sön la basa dl numer dles scolares y di scolars y di tëmps d’insegnamënt á la Junta provinziala fissé incö (ai 15 d’aurí) les regoles por la formaziun dles classes tles scores elementares, mesanes y altes, sciöche ince le numer di posć por i proscimi trëi agn de scora (chël o dí cina dl 2022/23). La deliberaziun é gnüda dada jö da düc trëi i assessurs por la scora Daniel Alfreider, Philipp Achammer y Giuliano Vettorato deboriada.

Al romagn zënza mudaziuns la grandëza mascimala dles classes tles scores elementares y mesanes cun al mascim 25 scolars. Por ci che reverda la scores altes él preodü tl scomenciamënt dl ann al mascim 27 scolares y scolars por passé tratan l’ann a indöt cina 29. Dala formaziun dla classa velel le prinzip dla balanza: al personal dirigënt ti vëgnel damané da tigní cunt canche al mët adöm les classes de na balanza danter scolares y scolars, livel de prestaziun, background de migraziun y bojëgns particolars. La Direziun competënta por la formaziun pó ince fissé mosöres aposta por na spartiziun mirada de scolares y scolars cun n background de migraziun, che á debojegn de n sostëgn linguistich spezifich, te istituc scolastics desvalis.

Le numer di posć dles personal insegnant reverda indöt 323,60 posć tles scores ladines, 5789 posć tles scores todësces y 1871,75 posć tles scores talianes. Le numer di posć por le personal insegnant ne s’á praticamenter nia mudé. Danü él gnü metü sö n contingënt por le personal insegnant che aladô dl resultat de controi de sanité legala y dl laur ne jô nia bun por l’insegnamënt. Al se trata de 6 posć tles scores ladines, 30 posć tles scores todësces y 20 posć tles scores talianes. Le numer di posć por la direziun y coordinaziun di practicums dles studëntes y di studënc dla Facolté de Sciënzes dla Formaziun é gnü confermé.

La scora ladina á insciö a desposiziun 323,60 posć por i proscims trëi agn. Al é rové lapró dui posć bele esistënc por la formaziun linguistica tl contingënt dla scora ladina. “La deliberaziun da incö é n stromënt de gran valüta por garantí la planificaziun ti proscims trëi agn, insciö tratan chësta perioda de malsigurté”, spliga l’assessur por la scora ladina Daniel Alfreider.

Ince l’assessur pro la scora todëscia Philipp Achammer sotlignëia la garanzia dla continuité didatica tl monn dla scora cun chësta dezijiun da incö dla Junta. “Al é sté meso da tó sö tla planificaziun plurianuala le finanziamënt de posć anuai”, insciö Achammer.

Da süa pert sotlignëia l’assessur pro la scora taliana Giuliano Vettorato la novité de 40 posć a tëmp plëgn che gnará finanziá dal Departimënt Scora taliana y 15 posć finanziá dai Zëntri linguistics. “Les iscriziuns é ince aumentades da dan da 5 agn de 512 scolars”, insciö Vettorato.

USP/jw/rc

Galaria dales fotografies