News

Regiun: paiá fora contribuc ai Consorc di Comuns dles döes Provinzies

Tratan na sentada tignida dan da püch á la Junta regionala tut la dezijiun da ti paié fora ales Provinzies de Trënt y de Balsan 580 mile euro porom ai dui Consorc di comuns.

Tla sentada dla Junta regionala tignida dan da püch (ai 17 d'aurí) sciöche videoconferënza él gnü deliberé sön proposta dl assessur regional, Claudio Cia, l’assegnaziun ales Provinzies de Trënt y de Balsan di fonds da destiné sides al Consorz di comuns trentins che al Consorz di comuns dla provinzia de Balsan por arjunje i fins istituzionai de gran interes publich preodüs dal articul 1 dla lege regionala di 25 de novëmber dl 1982 n. 10 sön i “Contribuc a bëgn dles delegaziuns provinziales UNCEM de Trënt y de Balsan”.

Cun le contribut ai dui Consorc provinziai dessel dantadöt gní coordiné i intervënc finanziars dla Regiun a bëgn di Consorc cun chi preodüs dales döes Provinzies a chisc. Ara nen vá inultima de n contribut por sostigní l'ativité istituzionala di Consorc por daidé i Comuns garantí i sorvisc publics, eserzité sües funziuns, formé i aministradus y le personal de comun.

Sön la basa dla deliberaziun aprovada dala Junta ti él porchël gnü assegné por l'ann 2020, ala Provinzia autonoma de Trënt y a chëra de Balsan la soma de 580.000 euro, da destiné ai Consorc dá dant dessura de vigni provinzia por arjunje i fins istituzionai de gran interes publich preodüs dala lege regionala. Por chësta rajun á la Junta regionala tut la dezijiun da impegné indöt la spëisa de 1.160.000 euro.

USP/fg