News

#IpiunindôSüdtirol: Aprovaziun dl dessëgn de lege

La Junta provinziala á aprové te na sentada speziala le dessëgn de lege por n passaje sigü y asvelt ala proscima fasa.

Le presidënt Arno Kompatscher (Foto ASP/Ivo Corrà)

La proteziun dla sanité y la responsabilité personala é stades tl zënter dla elaboraziun dl dessëgn de lege dla Junta provinziala por la reativaziun de na seria de ativités.

“La Junta provinziala á analisé na seria de propostes cun la priorité sön co atué les mosöres y nia sön can”, á dit le presidënt dla Provinzia Arno Kompatscher. Porchël él ince chësta proposta de lege dla Junta provinziala na pert ampla de regoles de comportamënt che reverda la vita soziala y situaziuns de laur. “I confidun tla colaboraziun dla popolaziun”, á dit Kompatscher. “Tla Junta provinziala sun stá düc a öna, che na reatiziun dles ativités desvalies pó ma ester poscibla cun la disciplina y cun la responsabilité personala de düc nos. I messun imparé da vire adöm al Coronavirus.”

La proposta dla Junta provinziala, che gnará sëgn menada inant al Consëi provinzial, contëgn i vari y les dates che reverda la reativaziun dles ativités preodüdes.

Öna dles mosöres che jará en forza cun l'aprovaziun dla lege sará la poscibilité da se möi te na manira lëdia sön döt le teritore dla Provinzia. Al ne jará nia plü debojëgn de na autodetlaraziun. Mo an messará se tigní ales regoles che reverda le mantignimënt dles destanzes y da curí bocia y nes.  

Al é preodü che canche la lege provinziala jará en forza (plüdessigü ai 8 de ma) podará dötes les ativités de comerz y de produziun ti seturs dla industrica, comerz y artejanat indô pié ia. Ai 11 de ma spo dötes les ativités economiches (cun la ezeziun dles impreses de sojornanza).

Sorvisc sön la porsona (frisers por ejëmpl) pó indo lauré dai 11 de ma, sciöche ince la gastronomia.

Ativités de ert y culturales (adöm a museums y biblioteches) podará ince lauré dai 11 de ma inant.

Dai 25 de ma dess spo ince les ativités de sojornanza y de turism podëi indô scomencé.

Por vigni reativaziun aldel ince lapró na seria de mosöres de segurëza, che mëss gní tignides ite dër avisa.

Na gran desfida sará aladô dla Junta provinziala la buna organisaziun danter familia y laur. “I fajarun de döt por daidé les families”, á dit le presidënt. Al sará ri da ciafé na soluziun, cun chëra che düc sará contënc.

Le dessëgn de lege prevëiga ince l'istituziun de na comisciun de esperc. Chësta á le compit da monitoré l'evoluziun epidemiologica y ti aconsié al presidënt mosöres plü frëmes, sce al sará debojëgn.

Le presidënt podará ince rezepí tres le dessëgn de lege mosöres statales nöies che vá dl vers de na daurida.

I contignüs é gnüs presentá incö te na conferënza stampa da pert dl presidënt Arno Kompatscher y i dui vizepresidënc Daniel Alfreider y Giuliano Vettorato.

USP/ea/fgo

Galaria dales fotografies