News

Sorvisc d’emergënza tles scolines y scores elementares

Geniturs che laora podará fá domanda plüssigü da en mercui inant por l’assistënza d'emergënza por mituns. La tematica é indoman söl ordin dl de dla Junta.

En lönesc dess le sorvisc de prescia tles scolines y scores elementares pié ia, iscriziuns da en mercui ai 13 de ma (Foto: pixpoetry/Unsplash

Do le scomenciamënt de na seria de ativités comerziales y artejanales él n gröm de geniturs che á indô metü man da lauré y che adora n’assistënza por les mitans y i mituns. Do che la Junta provinziala á stabilí dan da püch la fondamënta iuridica por l’assistënza te de pici grups sarál indoman ai 12 de ma söl ordin dl de l’assistënza d'emergënza por mitans y mituns tles scolines y scores elementares.

Al é preodü che i geniturs, che documentará la nezescité, podará bele fá domanda online por le sorvisc de assistënza d’emergënza da en mercui, ai 13 de ma dl 2020. I formulaurs sará online da indoman domisdé (12 de ma) sön le portal internet dl'Aministraziun publica o sön la plata internet dl Departimënt Intendënza y Cultura ladina. En jöbia gnará spo les domandes ejaminades. En vëndres ciafará spo i geniturs na resposta sce la domanda é gnüda azetada.

Le sorvisc de assistënza d'emergënza piará spo ia en lönesc ai 18 de ma cun grups de 4 mitans y mituns por la scolina y 6 por les scores elementares, naturalmënter tignin ite dötes les regoles de segurëza sanitara.

Cina la fin dl ann de scora él garantí l’assistënza por mitans, mituns, jones y jogn cun handicap, ma sce i geniturs mëss jí a lauré fora de ciasa y ne pó nia lauré te homeoffice. Por le momënt vëgnel stlarí da pert di suranstanc dles scolines y dles scores les modalités spezifiches dl’assistënza adöm al personal dles scolines y scores.

USP/jw

Galaria dales fotografies