News

Domënia y lönesc lites comunales y referendum costituzional 2020

Ai 20 y 21 de setëmber él tl Südtirol les lites comunales y por le referendum costituzional: dötes les informaziuns sön les modalités da jí a lité y sön la publicaziun di resultac.

Ai 20 y 21 de setëmber él tl Südtirol les lites comunales y por le referendum costituzional. (Foto: ASP/Ivo Corrà)

Planificades daimpröma por i 3 de ma dl 2020, sará les lites comunales te 113 comuns dl Südtirol y te 158 comuns dl Trentin en domënia ai 20 de setëmber dl 2020. Les lites é gnüdes sburlades da ma a setëmber porvia dla situaziun de emergënza che reverda l’epidemia Covid-19. La data nöia é gnüda stabilida tl mëis de messé dal presidënt dla Regiun Trentin-Südtirol, che á la competënza te chësc setur. Deache al é sön le porgram le medemo de ince le referendum confermatif sön le smendrimënt dl numer di parlamentars, sarál ince poscibl da lité en lönesc ai 21 de setëmber. Trëi comuns dl Südtirol – Freienfeld, Deutschnofen, Sarntal – á bele lité por le Consëi de comun y te chisc comuns reverda les lites ma le referendum costituzional.

Les lites comunales

Por les lites comunales podarán jí a lité te 475 seziuns litales. Les seziuns sará davertes en domënia 20 de setëmber dales 07:00 ales 23:00 y en lönesc dales 07:00 ales 15:00. La compëda dles chertes litales metará man en mertesc ai 22 de setëmber dales 09:00 y ará na dorada cina söporjö les 15:00. Litaziuns dezisives danter 2 candidac o candidates ombolt/a é sön le program en domënia ai 4 de otober dales 07:00 ales 21:00. Indöt pó jí a lité por les lites comunales tl Südtirol 413.679 zitadines y zitadins (203.779 ëi y 209.910 ëres). I candidac y les candidates é 4.403 (3.028 ëi y 1.375 ëres) sön indöt 323 listes. Ti comuns cun plü de 15.000 abitanc él indöt 40 candidac ombolt, de chisc 30 ëi y 10 ëres. Por le Consëi de comun él indöt 4.074 candidates y candidac sön lista (2.774 ëi y 1.300 ëres). I comuns cun manco de 15.000 abitanc á indöt 289 candidac y candidates por la inciaria da ombolt y da aconsiadú/aconsidëssa comunala (65 candidates y 224 candidac).

Les modalités de lita é desfarëntes ti comuns cun plü de 15.000 abitanc en confrunt cun i comuns cun manco de 15.000 abitanc. Ti comuns cun manco de 15.000 abitanc él i litadus che ará a desposiziun döes zetoles litales: öna de corú grisc por lité l’ombolt y l’atra de corú fucsia por lité le consëi comunal. Te chisc comuns vëgn i candidac por la inciaria de aconsiadú comunal ince conscidrá automaticamënter por la inciaria da ombolt. Al gnará lité sciöche ombolt le candidat che ará ciafé le plü gran numer de usc varëntes. Sön la secunda zetola litala (fucsia) gnará compedá sö i simboi de vigni lista cun dlungia cater sperses por l’indicaziun eventuala de usc de preferënza.

Ti comuns cun plü co 15.000 abitanc ará i litadus a desposiziun ma öna na zetola litala (fucsia) sön chëra che al é stampé i inoms di candidac ala inciaria da ombolt y dlungia le simbol dla lista o dles listes che le sostëgn. Tl Comun de Balsan ará i litadus ince a desposiziun na zetola litala por la lita di consëis de zircoscriziun.

Resultac 

Sön la plata internet ofiziala dles lites de comun 2020 tl Südtirol (por todësch, talian y ladin) pón consulté les listes cun düc i cantidac y les candidates. Ti dis dles lites gnará publicá sön chësta plata internet i dac ajorná dl’afluënza (cun indicaziun dl Comun cun l’afluënza plü alta y chël cun l’afluënza plü bassa) la domënia dales 12, dales 19 y dales 23 y le lönesc dales 15. Le de dla compëda gnará publicá por vigni comun i resultac provisors y spo chi definitifs. Deplü informaziuns é da ciafé son la plata internet dla Regiun Trentino-Südtirol.

Les indicaziuns sura les modalités de lita y dötes les informaziuns é da ciafé ince tl lingaz saurí, cun la brosciüra por todësch realisada da People First Südtirol dla Lebenshilfe y la brosciüra por talian.

Referendum costituzional

Por le referendum costituzional vëgnel lité te 489 seziuns te düc i 116 comuns dl Südtirol. Te Südtirol él indöt 392.784 zitadins (193.409 ëi y 199.375 ëres) che á le dërt da lité. Le numer di litadus é plü alt co por la lita comunala, nia ma por le numer de comuns (113 por les lites de comun, 116 por le referendum), mo ince deache pro les lites comunales ne pó nia tó pert chi che á la residënza tla Provinzia de Balsan da manco co 4 agn (articui 63 y 25 dl Statut d’autonomia).

Le cuesit dl referendum é: Aprovëise le test dla lege costituzionala che reverda „Mudaziuns di articui 56, 57 y 59 dla Costituziun che reverda la reduziun dl numer di parlamentars“, aprové dal Parlamënt y publiché sön la Gazzetta Ufficiale dla Republica taliana nr.240 di 12 d’otober 2019?”.

Les informaziuns sön le referendum é da ciafé por ladin y por todësch sön la plata internet dl Comissariat dl Govern por la Provinzia de Balsan, por talian ince sön la plata dl Ministér dl Intern. Ince sön chëstes plates gnará publicá i resultac. Les lites gnará tignides respetan les normes de segurëza cuntra le coronavirus.

USP/mpi/sf

Galaria dales fotografies