News

Covid-19, mosöres plü strëntes tl Südtirol cina ai 22 de novëmber

Le numer dles infeziuns nöies tl Südtirol vá söpert. Sentada straordinara dla Junta provinziala che á aprové n’ordinanza cun restriziuns nöies.

Le presidënt Kompatscher y l'assessur Widmann tratan la conferënza stampa de presentaziun dles mosöres preodüdes (Foto: ASP/Fabio Brucculeri)

L’aumënt dles infeziuns nöies da Sars-Cov-2 tl Südtirol y tla Talia é sté tl zënter dla sentada dla Junta provinziala inier ai 2 de novëmber. Do le barat d’informaziuns cun i ministri a Roma y cun i grups dl Consëi provinzial, él sté le presidënt Arno Kompatscher y l’assessur por la sanité Thomas Widmann che á anunzié les mosöres nöies. Incö gnarál sotescrit l’ordinanza nöia, che jará en forza dales 00:00 en mercui ai 4 de novëmber y ará valüta cina ai 22 de novëmber.

Reaziun nezesciara ala situaziun locala

“I esperc á preodü na secunda ona dla pandemia danter l’altonn y l’invern, mo degügn ne s’ess aspeté che al foss sozedü tan adora y tan debota. I un lauré chisc mëisc por arjigné ca le setur sanitar y l’assistënza por la jënt atempada le miú che ara vá, mo in messun antergní cun mosöres plü strëntes”, á splighé le presidënt Kompatscher. Le presidënt á ajunté che chësc provedimënt se basa sön le documënt scientifch aprové ai 8 de otober tla conferënza Stat-Regiuns, che prevëiga de plü formes de reaziun a livel local aladô dla situaziun.

Sanité sot a presciun

Do avëi presenté i dac che desmostra n aumënt di caji de infeziuns nöies tl Südtirol él l’assessur por la sanité Thomas Widmann che á sotligné che “i un ciamó capazités ince deache al é gnü aumenté le numer di lec por paziënc Covid. I messun impó antergní cun mosöres strëntes por garantí le bun funzionamënt di sorvisc de assistënza sanitara”. Widmann á recordé che l’aumënt de caji tles ultimes döes edemes á sburlé le sistem sanitar “al limit dles capazités, mo che sce i renunziun a contac personai y se tignun ales regoles scirtes dant spo podunse archité le contaje”.

Degügn spostamënc da sëra; bars, restoranc y botëghes stüc

Un di punc prinzipai che sará tl’ordinanza nöia é la proibiziun di spostamënc dal’abitaziun dales 20:00 da sëra cina les 05:00 dadoman. I restoranc, i bars, les dlaciaries y les conditories romagn stlüc, mo al pó gní porté tles ciases la spëisa. I hotí ne podará nia plü avëi sciori te ciasa, mo ma porsones che stá suranöt porvia dl laur. Al romagn stlüt cina ai 22 de novëmber les palestres, les nodadoies y les spa. Les botëghes, ater co chëres che vënn alimentars y bëgns nezesciars por le consum da vigni de, romagn stlütes. La domënia sará ma les apoteches, les botëghes dal tabach y di foliec davertes. Vigni sort de manifestaziun, de spetacul o de evënc publics o privac ne é nia conzedüs y/o pó ma gní organisades tres videoconferënzes.

Leziuns a destanza por les scores altes, trasport publich al 50 %

Por ci che reverda la scora él preodü da tigní leziuns da ciasa te dötes les scores altes y tl’Université cun n valgönes ezeziuns. “I orun mantigní les leziuns te classa por dötes les atres scores. Al gnará valuté la situaziun tresfora y al podess gní a se le dé mosöres nöies”, insciö Kompatscher. Le sorvisc de trasport publich ne vëgn nia mudé por ci che reverda i orars mo la capazité dles corieres, dles ferates y furnadoies podará ma gní anuzades por le 50 porcënt di posć a desposiziun por rajuns de stüde, de laur y de esigënzes nezesciares. Por ci che reverda le sport pón fá ativité individuala alaleria. Vigni sort de sport fat daite tles strotöres, sport de contat y scuadra ne é nia conzedüs. Al pó ma fá sport atlec y scuadres che tól pert a manifestaziuns de livel statal o internazional.

Smendrí i contac y spostamënc, de plü smart working

La Junta provinziala á lauré fora na seria de consëis che reverda le smart working y che dess gní metüs en pratica sides tl setur publich che ince tl privat. Le presidënt Kompatscher á fat n apel ales zitadines y ai zitadins da “smendrí le plü che ara vá i contac soziai y i spostamënc. Sce i se tignun ales regoles spo sarál poscibl da smendrí les infeziuns nöies y da tó demez la presciun sön le sistem dla sanité.”

 

 

USP/mb

Galaria dales fotografies