News

Coraggio-Mut tut gut–For inant da snait: operes te vidrina

Les operes de önesc artistes y artisć dl Südtirol gnará mostrades tles vidrines de Young Inside y Spazio a Balsan. Le proiet é nasciü da na colaboraziun danter i trëi grups de lingaz.

Les operes de önesc artistes y artisc dl Südtirol gnará presentades tles vidrines de Young Inside a Balsan (Foto Young Inside)

Les restriziuns porvia dl’emergënza Covid-19 á porté ala stlüta de museums y galaries d’esposiziun. La cultura y l'ert ne dess nia se archité y insciö él nasciü l’idea da costruí n dialogh cun la jënt te na forma particolara. La cooperativa Young – Inside á insciö metü en pe le proiet dal titul “Coraggio – Mut tut gut – For inant da snait” cun la particolarité che les operes sará da odëi por zitadins che passa dlungia ia pro les vitrines de “Young Inside” y de “Spazio” tla strada Torino 21 a Balsan.

La mostra é n invit ala popolaziun da se dé jö cun les operes culturales tratan i fistidi dla vita da vigni de passan dlungia ia.I laurs reverda dantadöt la pitöra mo al sará ince da odëi scoltöres y n’opera de grafia. Vigni edema gnarál mosré operes desvalies cina de forá dl 2021.

Al sará da odëi operes de önesc artistes y artisć: Egeon, Teseo La Marca, Gerald Moroder, Lorena Munforti, Sylvia Neulichedl, Monica Pizzo, Marius Romen, Andreas Senoner, Nikola Trafojer, Andreas Zagler y Chelita Zuckermann.

Al é n proiet en colaboraziun che mostra artistes y artisć te düc trëi i grups linguistics. L’assessur por la cultura ladina Daniel Alfreider recorda che pormöie proiec culturai é de gran valüta dantadöt ince te chësta perioda de crisa. “Implü é chësc n proiet che unësc düc trëi i grups de lingaz de nosta Provinzia cun vantaji sides por i artisć mo ince por i vijitadus”, insicö Alfreider.

“La cultura trasmët messaji importanc y é n invit ala speranza y á le capazité da cunté le coraje de chi che ó jí inant. Cun chësc proiet ti vëgnel dé na lerch de visibilité por les operes de artistes y artisć dl Südtirol y che á fat domanda por le contribut de 2.000 euro de sostëgn da pert dla Provinzia”, dij l’assessur por la cultura taliana Giuliano Vettorato.

Ince por l’assessur por la cultura todëscia Philipp Achammer é chësc n bel proiet de speranza y n messaje da tigní adöm y jí inant. “Complimënc a düc chi che á fat para pro chësta bela scomenciadia”, insciö Achammer.

Le proiet é gnü organisé dal Ofize Cultura taliana adöm cun l’Ofize Cultura ladina y Jonëza y l’ofize Cultura todëscia dla Provinzia de Balsan y fej pert dl secundo pachet de mosöres de sostëgn por artistes y artisć.

USP/tl

Galaria dales fotografies