News

Iesta nöia por les plates internet de cater scores profescionales

De setëmber é jüdes online les prömes plates internet dles scores profescionales dla Provinzia. Sëgn él ciamó cater scores che se presentëia sön internet cun na iesta plü moderna.

La plata internet nöia dla scora Gutenberg (Foto ASP)

Al é la scora profescionala por l’economia de ciasa y la nutriziun Salern  https://www.fachschule-salern.it/de/home, les scores profescionales de hotelaria da Bornech https://www.lhfs-bruneck.berufsschule.it/de/home y Maran https://www.kaiserhof.berufsschule.it/de/home, y la scora profescionala por le comerz y la grafica „Johannes Gutenberg“ https://www.gutenberg.berufsschule.it/de/home da Balsan. Dötes les scores á da pité n’oferta de formaziun ampla y tröc proiec y manifestaziuns interessanc, che vëgn sëgn presentá cun n layout daldöt nü.

“Na plata internet curada y inteliënta mostra te na maniera interessanta y curiosa la scora y süa vita da vigni de tan varia, ara trasmët insciö ince le sentimënt d’apartenënza y n pü‘ la sensaziun da ester dailó“, dij  Maria Magdalena Kranebitter, direturia dla scora  profescionala provinziala de hotelaria da Bornech, che é le zënter de formaziun tl ciamp dl turism por la Val Badia y por döt Puster. Atualmënter é 407 scolares y scolars scric ita a chësta scora.

Sistem inovatif y strotöra de navigaziun unica

Les plates internet á sciöche basa n sistem inovatif de content management che é saurí da anuzé y che se adatëia bun ai aparac desfarënc (smartphones, tablet). Dötes les scores adora la medema strotöra de navigaziun. I cursc de formaziun é organisé te na forma zentrala söl portal dla formaziun https://weiterbildung.buergernetz.bz.it/.

Les scores profescionales dla Provinzia adora por l’ajornamënt de sües plates internet la medema strotöra y vëgn realisades en colaboraziun cun la Repartiziun Informatica, les direziuns scolastiches, les scores profescionales talianes y todësces dla Provinzia y la Aziënda Informatica dl Provinzia (SIAG).

USP/rm/fgo

Galaria dales fotografies