News

L’azes ala Val Badia ciafa bel plan na forma – metü sö le punt

Cun n punt de 144 metri vëgn l’azes nü ala Val Badia colié ala strada statala. Da mëte sö le punt ôl ester na tröpa competënza y profescionalité.

Montaje dl punt por l'entrada nöia dla Val Badia: le punt passa sura la linia dla ferata y le lerch artifizial (Foto: USP/Bernd Griessmair)

Le punt nü che coliará a San Laurënz la strada statala de Puster cun l’azes nü ala Val Badia vëgn metü sö chisc dis – n laur comples, deache le punt é lunch 144 metri y pësa 1.040 tones. Vare important por la costruziun dl’entrada nöia.

Laurs complicá dl montaje dl punt sura la linia dla ferata

Por rové al montaje dl punt él gnü a se le dé n laur de prepraziun de passa cinch mëisc, sce an conscidrëia la proietaziun, les autorisaziuns, le trasport dles perts dl punt y d’atri laurs. Chësta arjunta importanta pro la realisaziun dl’opera é gnüda a se le dé danter la nöt dai 22 ai 23 de dezëmber, do la pröma gran arjunta che reverda la perforaziun dl tunel. Al vëgn lauré de nöt deache al é nezesciar da stlü la linia dla ferata por garantí la sigurté.

Momënt important por la realisaziun de döta l'opera

Tratan le montaje dl punt inier da sëra (22 de ezëmber) él stá presënc danter l’ater l’assessur por la mobilité Daniel Alfreider, l’ombolt da San Laurënz Martin Ausserdorfer adöm a rapresentanc dla Repartiziun Infrastrotöres y dles dites interessades. “Le montaje dl punt é n momënt important por la realisaiziun de döta l’opera. Al ne é nia ma na prozedöra tecnica complicada, mo al é ince doia n gran laur de planificaziun y de proietaziun”, á dit l’assessur Alfreider che á sotligné la buna colaboraziun danter les dites, la Repartiziun Infrastrotöres y le Comun de San Laurënz.

Ince l’ombolt de San Laurënz Martin Ausserdorfer á dit che an é rová inant bun cun i laurs: “Sce an conscidrëia che i laurs é gnüs fac y vëgn fac tl contest dla pandemia dl coronavirus y cun lapró les problematiches di ri tëmp dl 2019 y 2020 spo él i laurs che vá dër bun inant”.

Montaje dl punt dess gní stlüt jö cina la fin de forá

Les perts de aciá dl punt é gnüdes realisades dala dita Cimolai. Sce le tëmp le pormët, spo dess le punt gní istalé cina la fin de forá sides sura la linia dla ferata co ince sura le lech artizial. Implü vëgnel lauré ala realisaziun dl tunel, olache al laora les dites Strabag AG, Alpenbau GmbH, Moser & Co. GmbH y Geobau GmbH.

a contlujiun di laurs é preodüda aladô dl responsabl di laurs Umberto Simone por Nadé 2021. L’entrada nöia dla Val Badia pëia ia cun le tunel a Pflaurënz lunch 400 metri y che vá spo inant cun n punt de 140 metri sura le lech che condüj a n rondel che fajará da coliamënt cun la strada prinzipala de Puster.

File video y audio

Video Montaje dl punt de nöt

Video montaje dl punt tratan le de

Intervista assessur Alfreider (ladin)

Audio

Alfreider - Pichler - Ausserdorfer

 

USP/san

Galaria dales fotografies