News

Gherdëina: doi linies eletriches vën metudes sota tiera

Mudazion di plans urbanistics de Ciastel, Laion, Urtijëi y Santa Cristina per mëter sota tiera doi linies dla lectrisc. Nvieda via la pruzedura per miuré la destribuzion d’energia te Gherdëina.

La trassa dla linia eletrica nueva sota tiera danter la cabines Laion-Val d’Anna. (Ortofoto)

Per miuré la cualità dl servisc de destribuzion d’energia eletrica te Gherdëina uniral fat doi linies eletriches nueves sota tiera a tenscion mesana (MT) 20kV danter la cabina primera "Laion" y la cabines "Val D’Anna" y "Sureghes". Sun ntervënt dl’assessëura per la natura, la cuntreda y l svilup dl teritore Maria Hochgruber Kuenzer à la Jonta provinziela apurvà inier (26 de jené) la mudazion d’ufize di plans urbanistics cumenei curespundënc. L se trata defati de n lëur de nteres provinziel. Na dumanda de mudazion fova unida prejenteda dala sozietà Edyna srl. "La criazion de doi linies dla lectrisc nueves nluegedes defin sota tiera à – ora che miuré l refurnimënt de energia te Gherdëina – fazions positives sun l ambient cun ntervënc che respetea la carateristiches dla cuntreda dla valeda", dij l'assessëura Hochgruber Kuenzer. La delibra unirà publicheda sun l portal web dla Provinzia y sun la tofles di Chemuns de CiastelLaionUrtijëi y Santa Cristina per n ptëmp de 30 dis ndolauter. Per l medemo tëmp iela depusiteda y metuda ora per l publich pra la sënta di Chemuns y pra l Ufize provinziel planificazion teritoriela y cartografia.

La linia eletrica danter la cabines Laion-Val d’Anna vën metuda sota tiera

La prima linia eletrica MT sota tiera, cabina primera Laion - cabina Val d’Anna, pëia via dala cabina Laion - La Sia tl Chemun de Laion y tol la direzion dla streda statela de Gherdëina nchin ala mbuceda dla streda Socrëp. La linia ti va do ala streda Socrëp nchin pra la mbuceda dla streda Purger, dadedò passela sëura l ruf Derjon via y va inant sun la linia dla statela nchin al rundel dan l tunel ulache la passa inò via l Derjon per arjonjer l puent per i pedons "Vidalong" tres la streda per la rodes. La linia passa pona inò via l puent dl Derjon y la Plaza Sant Antone per tò l tunel da jì a pe de viers dla stazion a val dla furnadoia Secëda. Tres la streda Val d’Anna y l purtoi dai schi vëniel arjont l pont finel dla trassa pra la cabina Val d’Anna.

Nce la linia eletrica Urtijëi-Sureghes vën metuda sot a tiera

La segonda linia dla lectrisc MT sota tiera, zënter d’ Urtijëi - cabina Sureghes, pëia via a Urtijëi y ti va do ala promenada nchin tla streda Minert. La linia va inant per chësta streda nchin pra la mbuceda dla streda Rives do vester passeda via l ruf Piz. Ti jan do ala streda Rives passela via l Derjon respetivamënter l ruf Saltaria, dadedò passela inò via l Derjon tulan la streda Mulin D’Odum, ulache l ie udù danora la realisazion de na cabina nueva.

USP/sa

Galaria dales fotografies