News

Jonëza: Löm vërda dala Junta al program anual

La Junta provinziala á aprové le program anual por la promoziun dl sorvisc ai jogn ladin sön proposta dl assessur ala scora y cultura ladina y ala jonëza Daniel Alfreider.

Jonëza: Löm vërda dala Junta al program anual (Foto: Sorvisc ai Jogn Val Badia)

Löm vërda da pert dla Junta provinziala al plann anual por la promoziun dl sorvisc ai jogn dl grup linguistich ladin por l'ann 2020. Do l'arat positif dla Consulta é sëgn le plann gnü aprové dala Junta provinziala ai 24 de forá dl 2020 sön proposta dl assessur por la scora, cultura y jonëza ladina Daniel Alfreider. “Ince tl tëmp de pandemia él les organisaziuns joniles ladines che se á dé da fá cun gran motivaziun y creativité por ti pité a nostes jones y nüsc jogn proiec inovatifs y formes nöies de interaziun”, dij l’assessur Alfreider. Dantadöt te chësta perioda de restriziuns él important da mantigní i contac danter les jones y i jogn che é de importanza fondamentala por le svilup dl singul y por döta la sozieté, insciö Alfreider.

I punc fondamentai dl plann anual é le mioramënt cualitatif dl sorvisc por la jonëza y la partezipaziun dla jonëza por contribuí ativamënter al svilup democratich dla sozieté aladȏ dles generaziuns.

Por ci che reverda la pert finanziara él preodü indöt 281.520,00 Euro por la promoziun dles ativités, di cosć dl personal y por proiec. Implü röiel lapró investimënc por 6.000,00 Euro.

Inrescida sön la jonëza y proiec inovatifs

Al gnará sostigní proiec inovatifs danter les organisaziuns joniles y danter i grups linguistics por amplié la rëi de colaboraziun danter les strotöres provinziales. Por ci che reverda la formaziun él preodü cursc de ajornamënt dles colaboradësses y di colaboradus volontars y de profesciun por mioré tresfora la cualité di sorvisc pitá. Na novité dl 2021 é la realisaziun de n’inrescida sura i jogn, les jones de döta la provinzia sön tematiches desvalies (politica, laur, familia, scora, ambiënt, dependënzes y i.i.). L’inrescida plü atuala te chësc ciamp é gnüda fata dan da 5 agn.

Tres le plann anual por la promoziun dl sorvisc ai jogn ladin vëgnel ince sostigní la Consulta provinziala dla jonëza ladina te so laur de consulënza che reverda i debojëgns y les ghiranzes dla jonëza tres l’organisaziun de convëgns y manifestaziuns culturales sön tematiches joniles.

Arat positif ince dala Consulta dla jonëza ladina

Dan l’aprovaziun da pert dla Junta él sté la Consulta provinziala dla jonëza ladina che á dé jö so arat positif dl plann anual te na sentada ai 11 de forá. Al é ince sté la pröma sentada virtuala dla Consulta nöia. Por l’Ofize Cultura y jonëza ladina á tut pert ala incuntada le diretur de Repartiziun Aministraziun scora y cultura ladina Mathias Stuflesser y la colaboradëssa Carla Pedevilla.

Da pert dl diretur Mathias Stuflesser él gnü sotligné che al vëgn lauré dassënn adöm cun l’assessur Alfreider por garantí le finanziamënt y i cosć dl personal dles döes gran organisaziuns joniles ladines, le Sorvisc ai Jogn Val Badia y Nëus Jëuni Gherdëina. Da süa pert á Pedevilla rengrazié les organisaziuns por le gran laur fat “por la jonëza zënza mai s’archité, ince canche döt ê stlüt, cun creativité y flessibilité, lauran por nosta jonëza.”

 

USP/rc

Galaria dales fotografies