News

Ejam de Stat dl 2021 por 92 candidates y candidac tles scores ladines

Por l’ann de scora 2020/21 él preodü indô na forma particolara dl Ejam de Stat porvia dla situaziun de emergënza Covid-19. Les proes fej referimënt al Ejam de Stat dl ann passé.

Ejam de Stat dl 2021 por 92 candidates y candidac tles scores ladines. (Foto: Unsplash)

En chësc ann sarál 92 scolares y scolars che fajará l’Ejam de Stat do la contlujiun di cinch agn dles scores altes ladines y dla scora profescionala ladina. Tles scores todësces él indöt 2849 che fajará les proes de contlujiun, de chisc él 2334 scolares y scolars che fej na scora alta, 77 é scolares y scolars privatisc’ y 438 scolars y scolares de na scora profescionala.

Les proes metará man ai 16 de jügn dl 2021 cun n ejam a usc strotoré. Al ne gnará fat degönes proes scrites. Tratan l’ejam a usc gnarál ince traté n elaborat scrit. Te chësc laur scrit nen vará dantadöt dles materies tipiches de vigni singula scora che é gnüdes stabilides tres le Minister dl’Istruziun por döta la Talia (en ajunta les listes dles materies). La forma pó ester desfarënta aladô de vigni orientamënt scolastich. Tl Südtirol gnarál debatü  tratan l’ejam sön tesć che é gnüs analisá tratan les leziuns y che sará un por todësch y l’ater por talian.

L’ejam a usc jará spo inant sön la basa de materiai d’impuls chiris fora dala comisciun. Al gnará ince valuté les competënzes tl ciamp dl’ “Educaziun zivica” che vëgn tratada te deplü materies. Tles scores altes ladines gnarál tigní na pert dl ejam ince por ladin.

Les Comisciuns d’Ejam sará formades da sis rapresentantes y rapresentanc interns y da na presidënta o n presidënt estern. Le consëi de classa tolará la dezijun sce les scolares y i scolars gnará ametüs al ejam.

Deplü informaziuns ciafon sön la plata internet dla Scora ladina y sön la plata internet dl Minister dl’istruziun.  

USP/red/jw

Galaria dales fotografies