News

Linia eletrica Laion-Corvara: prejentà l proiet de mascima

L ie unì prejentà l proiet de na linia eletrica nueva sot a tiera de 23 km danter i chemuns de Laion y Corvara. Dann ambientel mënder, segurëza dl refurnimënt energetich.

Terna à prejentà l proiet de na linia eletrica sot a tiera danter Laion y Corvara (Foto: ASP)

Na linia nueva a tenscion auta danter i chemuns de Laion y Corvara, longia 23 km y realiseda defin cun cabl sot a tiera. N proiet de mputanza che garantësc la segurëza de refurnimënt, dantaldut ti zëntri dl turism da d’inviern ti raions dl Jëuf de Frea y dl’Alta Badia. La infrastrutura nueva dl plan de nvestimënc de Terna per l svilup energetich tl Südtirol giapa forma. L proiet ie unì prejentà n ch’sta di dala sozietà che mëina la rë de trasmiscio naziunela al Presidënt Arno Kompatscher, al assessëur per l’energia Giuliano Vettorato y al ambolt de Laion, Stefan Leiter, ai ambolc di Chemuns de Gherdëina (Christoph Senoner, Tobia Moroder y Roland Demetz) y al prim zitadin de Corvara Robert Rottonara.  

"Chësc proiet ie n var mpurtant per seguré l refurnimënt reguler d’energia eletrica” – sotrissea Kompatscher – “y l tucherà doi raions turistics scialdi cunesciui che se damanda dantaldut d’inviern na segurëza auta de refurniment eletrich per i mplanc portamont.” L se trata de n ntervënt mpurtant damandà dassënn te chësc raion pervia dla ntraunides meteorologiches estremes. Chësc ntervënt ie ora de chël ënghe de mpurtanza per pudëi realisé nosta vision de Green Region a na maniera da pudëi crië la cundizions per svilupé na mubiltà sustenibla, propri de viers de nosta cuntreda unica, detlareda dala UNESCO arpejon mundiela dla umanità".

Aldò dl plan de mascima dla trassa sarà la infrastrutura de mënder dann per l ambiënt y purterà pro a garantì la segurëza energetica plëina per la Olimpiada Milan Cortina 2026. "Cun Terna – sotrissea l assessëur per l’energia Giuliano Vettorato y l assessëur per la mubiltà Daniel Alfreider – ons nvià via da giut n bon raport de culaburazion che vëij danora che n tole ite la zitadinanza y la aministrazions locales y che n se cunfruntëie limpea. É crëta che saron tosc boni de prejenté n proiet definitif sustenibly inuvatif per l svilup  dla infrastrutura de nosc teritore.”

 

USP/tl

Galaria dales fotografies