News

L’ann de scora „dles malsigurtés“ é jü a piz

I assessurs Alfreider, Vettorato y Achammer á fat incö n bilanz dl ann de scora 2020/21 y presenté les previjiuns por l'ann de scora che metará man tosc.

I assessurs Achammer, Vettorato y Alfreider tratan la conferënza stampa de contlujiun dl ann de scora 2020/21 (Foto: ASP/F. Brucculeri)

Les contlujiuns por ci che reverda l’ann de scora apëna rové y les prospetives por le scomenciamënt dl ann de scora nü é stades les tematiches zentrales dla conferënza de contlujiun dl ann de scora 2020/21 incö ai 12 de lugio a Balsan. I trëi assessurs por la scora Daniel Alfreider, Giuliano Vettorato y Philipp Achammer á presenté n bilanz cun evaluaziuns spezifiches por vigni Departimënt scolastich. I resultac di ejams de contlujiun é gnüs presentá dala direturia dl'Intendënza scolastica ladina y dla Cultura ladina Edith Ploner y dai suranstanc scolastics Vincenzo Gullotta, Gustav Tschenett y Sigrun Falkensteiner.

L’assessur Alfreider á sotligné che al é sté n ann cun na seria de malsigurtés che á porté a tröc mudamënc tratan l’ann cun na gran flessibilité desmostrada da scolars, insegnanc y geniturs. “Ma cun la partezipaziun de dötes y düc él sté meso da arjunje la contlujiun dl ann y chësc é n gran mirit de döt le monn dla scora, di scolars y geniturs. L‘assessur Achammer á ince dit che al á orü ester n gran sforz por rové ala fin dl ann, l’assessur Vettorato á dit che al é sté n “ann ri y plëgn de dificoltés”. I trëi Departimënc scolastics á ince metü da jí na evaluaziun dl ann de scora 2020/21 cun domandes a scolars, geniturs y insegnanc.

Aumënt dles competënezs digitales, stanchëza, demotivaziun

Por ci che reverda la scora ladina él sté le Sorvisc de valutaziun dl’istruziun y formaziun ladina che á fat n evaluaziun cun chestionars compilá da 1269 porsones (514 scolares y scolars, 188 insegnantes y insegnanc y 567 geniturs). I chestionars é gnüs compilá danter mez ma y mez jügn dl 2021. Al se trata de na evaluaziun cuantitativa y cualitativa. I dac plü interessanc dij che na gran pert di scolars (66 porcënt) se sintî stanc tl tëmp dla rilevaziun ala fin dl ann des scora. Le 78 porcënt di scolars á dé dant de avëi amplié les competënzes digitales.

Por ci che reverda i insegnanc él le 77 porcënt che se sint stanc. Esperiënzes positives reverda indere i aspec dla competënza digitala. Por i insegnanc él sté plü ri da manajé mitans y mituns cun dificoltés y da mantigní alta la motivaziun. I geniturs á dé dant por l’88 porcënt la capazité di scolars da se adaté ala situaziun de pandemia. Al é gnü aprijé la capazité di insegnanc da se adaté ala situaziun y da capí les dificoltés. Ince i stromënc tecnologics a desposiziun é gnüs aratá en pert sciöche na gaujia de critizité. “L’insegnamënt a destanza á porté te deplü caji te chësta inrescida a demotivaziun y insciö él fondamental da podëi garantí scora en presënza ince tl dagní”, dij l’intendënta Edith Ploner.

Presentaziun di resultac de finn dl ann de scora

Cun la contlujiun di ejams dla scora mesana y alta s’ál stlüt jö l’ann de scora 2020/21. Indöt él 4.086 scolars che á ciafé na valutaziun positiva por ci che reverda l’Ejam de Stat, 92 tles scores altes ladiens, 2778 te chëres todësces y 1216 te chëres talianes. Tles scores mesanes él indöt 5722 scolars che á ciafé na valutaziun positiva pro l’ejam de contlujiun, 236 te na scora mesana ladina, 4040 por ci che reverda chëres todësces y 1446 chëres talianes.                                                                                                     

I resultac dles scores altes y profescionales ladines

N’odlada ti él ince gnü dé ai resultac di Ejams de Stat cun indöt 4047 scolares y scolars cha á ciafé na valutaziun positiva. De chisc á fat 2721 scolares y scolars l’Ejam de Stat pro na scora alta todëscia, 1225 pro na scora taliana y 92 pro na scora ladina. Tles scores altes ladines él indöt 9 scolares y scolars che á ciafé na valutaziun finala de 100 punc, de chisc öna na scolara che á ciafé 100 cun lalt. 13 scolares y scolars á ciafé na valutaziun danter 91 y 99 punc, 25 scolares y scolars danter 81 y 90 punc, 36 scolares y scolars danter 71 y 80 punc y 9 scolares y scolars danter 61 y 70 punc. 

I resultac dles scores mesanes ladines

Tles scores mesanes ladines él 236 sön 237 scolars lasciá pro al ejam che á superé l’ejam de contlujiun dla scora mesana. “Diesc cun lalt” él 9 scolares y scolars che á ciafé, 34 á ciafé la valutaziun de “diesc”. Na valutaziun de “nü” él 62 che á ciafé, 73 scolares y scolars á ciafé la valutaziun de “ot” y 48 á ciafé “set” y indöt 10 á ciafé “sis”. Dui scolars ne é nia gnüs ametüs al ejam de contlujiun

Promoziuns scores elementares, mesanes y altes en general

Por ci che reverda les promoziuns tles scores elementares y mesanes él 1138 scolares y scolars (99,82 porcent) che é gnüs ametüs/ametüdes ala proscima classa tles scores elementares o ala pröma classa dla scora mesana. 2 ne é nia gnüs ametüs. Tles scores mesanes ladines él 675 scolares y scolars (99,11 porcent) che é gnüs ametüs ala proscima classa dla scora mesana o ala pröma classa dla scora alta. 6 ne é nia gnüs ametüs. Por ci che reverda les scores altes él 439 che á ciafé la promoziun ala fin dl ann de scora, 53 á ciafé na sospenjiun dl iudize, 22 ne á nia superé l’ann scolastich.

Previjiun por l’ann de scora nü: Poscibilmënter en presënza

Dötaurela vëgnel bele lauré al ann de scora nü. An spera da podëi pité l’insegnamënt en presënza te düc i liví scolastics y l’orar didatich plëgn danmisdé y domisdé. Al gnará regolamenté entrades y sortides por evité mejes de jënt. Implü él odü dant mosöres de igiena cun la regola dla maschera ciamó da definí plü avisa. “Implü oressun preodëi n screening general por le mëteman dla scora por podëi pié ia le 100 porcënt en presënza”, á dit Alfreider. Adöm cun Achammer y Vettorato á i assessurs sotrissé l’importanza dla responsabilité personala y coletiva. “Le scomenciamënt dl ann de scora depënn dai comportamënc dl isté y dal numer de vazinaziuns.” Al ne gnará fat degöna oblianza dla variora, mo al gnará aconsié dassënn da se vaziné. 

 

USP/rc

Galaria dales fotografies