News

Comunicac dla Provinzia: portal y sistem nüs

La Provinzia de Balsan publichëia da incö inant sü comincac tres n sistem nü. Por i zitadins y i rapresentanc di media él nezesciar da fá n’iscriziun nöia. Novités ince söl portal sön internet.

Cun na iesta grafica nöia, na plata internet ajornada cun n motor de chirida plü asvelt y na navigaziun plü scëmpla: chëstes é les novités prinzipales dl portal y sistem nüs cun chi che l’Ofize stampa dla Provinzia publichëia da incö (15 de lugio) inant sü comunicac stampa.

I comunicac stampa gnará mená sciöche tres a dötes y düc i rapresentanc di media che á fat l’iscriziun al portal news dla Provinzia. Ince por les zitadines y i zitadins él poscibl da ciafé les informaziuns y novités dal' Aministraziun provinziala y dala Junta provinziala sciöche denant. An mëss ma un n iade fá l’iscriziun por ativé le sorvisc. I rapresentanc di media ciafará na e-mail cun vigni comunicat stampa publiché, i zitadins na e-mail cun n  ressümé dui iadi al de.

L’iscriziun pon fá clican sön i links: iscriziun por todësch, iscriziun por talian.

Sön la plata internet News dla Provinzia él da incö ma plü les noeles dl’edema da denant da odëi. Düc i comunicac stampa mená dan ai 8 de lugio é da ciafé tla seziun dl "News Archif" y ince tres la funziun dla chirida sön la plata internet. Dal 2002 inant él gnü publiché ti trëi lingac indöt 121.530 comunicac stampa che á ince na funziun de trasparënza y documentaziun dles ativités dla junta y dl'aministraziun provinziala. 

Le sistem digital nü é gnü elaboré dal Ofize stampa dla Provinzia adöm cun l'Informatica Alto Adige SpA (SIAG). I vantaji é na funziun de chirida plü sterscia y na iesta grafica nöia plü scëmpla cun n “menü” plü saurí da manajé. N vantaje é ince che vigni comunicat stampa é colié ales atres verjiuns de lingaz te na manira automatica. Le program de rapresentaziun y de aministraziun dles plates internet (CMS - Content management system) che vëgn adoré é ince nü.


Clican chiló röiun ala verjiun originala dl comunicat stampa por visualisé imajes, documënc o video che taca lapró

USP/gst/ic/rc