News

Al mët man la scora por 90.454 scolares y scolars

I trëi assessurs Alfreider, Achammer y Vettorato é otimisć por le scomenciamënt dl ann de scora nü y ti aoda a dötes les scolares y a düc i scolars n bun ann de scora.

En lönesc ai 6 de setëmber mëtel man por passa 90.000 scolares y scolars, mitans y mituns dla scolina n ann de scora nü tl Südtirol. Le scomenciamënt dl ann de scora mët man sot a condiziuns particolares, ince sce al é gnü detlaré da orëi garantí l'insegnamënt en presënza sön döt le teritore statal. "Cun le mëteman dla scora él le focus prinzipal sön l'insegnamënt en presënza meton tla pratica ince mosöres de sigurté ajuntives", sotlignëia i assessurs por la scora Daniel Alfreider, Philipp Achammer y Giuliano Vettorato. 

Atualmënter él la regola che sides les mitans y mituns dai 6 agn insö y le personal mëss se vistí la maschera tratan scora. Al é aconsié da tigní destanzes de almanco un n mëter danter les porsones, tres canche al é poscibl. Cina ai 31 de dezëmber dl 2021 él döt le personal de sorvisc tles istituziuns de formaziun y tles universités y düc i studënc dles universités che mëss avëi para la zertificaziun vërda europeica. 

Por ci che reverda i tesc nasai él ciamó la Junta che definësc les modalités dl screening che dess gní fat dui iadi al'edema por cater edemes. 

Ann de scora 2021/22: Les zifres

Tles 17 scolines ladines él inann indöt 626 mitans y mituns scrites y scric ite. Indöt 1129 scolares y scolars é scrites y scric ite te na scora elementares dles valades ladines, 693 tles scores mesanes y 522 tles scores altes y tla scora profescionala dla Val Badia y de Gherdëna. Indöt él 2970 iscriziuns te na scolina y scora dles valades ladines. L'assessur Alfreider sotlignëia che "ince te chësta perioda dl coronavirus él fondamental da investí sön la formaziun de vigni singula porsona y sön la responsabilité coletiva por garantí le svilup de nosta comunité ladina. Le rode dles insegnantes y di insegnanc é te chësc vers de gran valüta. Al é nosc obietif da lauré sön la digitalisaziun, nia siöche alternativa ala scora en presënza mo sciöche oferta ajuntiva, ince por ti jí adicuntra ai debojëgns de döes les scolares y scolars.”

Indöt jará 65.481 scolares y scolars jará da lönesc inant a na scolina o scora todëscia. Tl ann de scora 2021/22 él 11.322 mitans y mituns che vá a scolina, 20.481 scolares y scolars vá ala scora elementara, 12.130 scolares y scolars ala scora mesana, 13.097 studëntes y studënc frecuentëia la scora alta y 8.451 jones y jogn fej na scora profescionala. "I laorun por fá le poscibl por garantí l'insegnamënt en presënza. I sun sigü che al sides poscibl en colaboraziun cun düc i interessá", á dit Achammer. 

Indöt jará 22.003 scolares y scolars jará da lönesc inant a na scolina o scora taliana. Tl ann de scora 2021/22 él 3.175 mitans y mituns che vá a scolina, 6.139 scolares y scolars vá ala scora elementara, 4.154 scolares y scolars ala scora mesana, 6.649 scolares y scoalrs frecuentëia la scora alta y 1.886 jones y jogn fej na scora profescionala. L'assessur Vettorato á recordé por l'ocajiun che l'insegnamënt en presënza, mo ince la digitalisaziun y l'inovaziun didatica é pilastri importanc por le svilup dla didatica. 


Clican chiló röiun ala verjiun originala dl comunicat stampa por visualisé imajes, documënc o video che taca lapró

USP/ck