News

De mondial dl insegnamënt, rengraziamënt da pert dla Junta

En ocajiun dl De mondial dles insegnantes y di insegnanc él i assessurs Alfreider, Achammer y Vettorato che á orü rengrazié dötes les insegnantes y i insegnanc dla scora südtiroleja.

Le De mondial dles insegnantes y di insegnanc vëgn festejé incö ai 5 de otober. En chësta ocajiun él i assessurs por la scora Daniel Alfreider, Philipp Achammer y Giuliano Vettorato che á orü rengrazié dötes les insegnantes y düc i insegnanc por so rode fondamental tla sozieté, dantadöt ince te chësta situaziun de pandemia.

Te na situaziun de dificoltés él indöt 8.900 insegnantes y insegnanc che laora vigni de cun gran dediziun por garantí la didatica en presënza por zirca 74.000 scolares y scolars tl Südtirol. L’assessur por la scora ladina Daniel Alfreider sotlignëia che: “La perioda de pandemia nes á desmostré tan important che al é por nostes scolares y por nüsc scolars le contat diret cun i insegnanc. Degöna forma de insegnamënt a destanza, ince arjigné ca tla manira plü prezisa, ne podará mai garanti le cualité dl insegnamënt en presënza. I rengraziun porchël dötes les insegnantes y düc i insegnanc por sü sforc, süa dediziun por le bëgn de nostes scolares y de nüsc scolars.”

“I söporjö 6.600 insegnanc dles scores de lingaz todësch dl Südtirol ne é nia ma esperc te sües materies y tl laur pedagogich-didatich, mo ai é leader che ti dá na formaziun a nüsc jogn y a nostes jones”, sotlignëia l’assessur por la scora todëscia Philipp Achammer. La profesciun de insegnant se damana tröp, mo ara dá ince tröp y dantadöt tla perioda atuala él nüsc insegnanc che garantësc n sostëgn important y na stabilité a nüsc scolars, insciö Achammer.

“Nüsc insegnanc laora cun pasciun y entusiasm por la formaziun dles generaziuns che vëgn docá. I laorun por ti dé tres de plü atenziun al monn dla scora y a döt le personal scolastich. Al é n monn de porsones che laora cun motivaziun. La scora funzionëia sce al vëgn valorisé les capazités de düc y dötes chi che fej para”, sotlignëia l’assessur por la scora taliana Giuliano Vettorato.

Zifres atuales

Tl monn dla scora ladina él dötadöm zirca 400 insegnantes y insegnanc y 2.340 scolares y scolars, tl monn dla scora todëscia indöt 6.603 insegnantes y insegnanc y 53.160 scolares y scolares y por ci che reverda la scora taliana indöt 1.864 insegnantes y insegnanc y 18.820 scolares y scolars. 




Clican chiló röiun ala verjiun originala dl comunicat stampa por visualisé imajes, documënc o video che taca lapró

USP/tl