News

La Val y Badia: Seria de intervënc de sigurté da smöies y lovines

 Por cunt dl Ofize Sistemaziun di rüs da munt ost él gnü fat na seria de laurs de metüda en sigurté pro le Rü de Ciamplorët tl Comun de La Val y tles vijinanzes dl lüch Verda tl Comun de Badia.

Por le lüch Verda tl Comun de Badia él gnü stlüt jö dan da püch i laurs de ressanamënt dles operes de proteziun da lovines che é gnüdes danajades dala tempesta Vaia. D’atri laurs de sistemaziun dl rü é ince gnüs fac pro le Rü de Ciamplorët tl Comun de La Val.

Plü sigurté pro le Rü de Ciamplorët

Do che ti agn passá él gnü a se le dé na erojiun sota de na pert dl Rü de Ciamplorët él l’Ofize competënt che á metü da jí i laurs de sistemaziun dl rü cun na mosöra de prescia. I laurs á metü man de jügn sot ala coordinaziun de Sigisfredo Moling y reverda la costruziun de barieres de consolidamënt nöies y müres de proteziun. Implü él ince gnü ressané n toch danajé da na smöia. Indöt él gnü partí sö i laurs te cater loc por na soma de 250.000 euro por vigni intervënt. Pro le pröm lot á i laurs sura le punt a Pidro metü man de jügn y é gnüs portá a piz d’agost sot ala direziun dl injinier Thomas Gamper. Implü él ince gnü ressané n toch danajé da na smöia. I atri trëi loc reverda laurs danter Ciampló y Lunz. Le proiet é te chësc caje gnü realisé da Martin Moser, la direziun di laurs ti é gnüda surandada a Michael Baumgartner. Dan da püch él gnü stlüt jö i laurs por le secundo di cater loc.

Costruziun de na strotöra de ressanamënt do na smöia

Dala pert orografica a man ciampa dl Rü de Ciamplorët él implü gnü fat sö mürs de proteziun de lëgn por mët en sigurté chël toch de parëi danajé da na smöia. Implü él ince gnü istalé tl parëi na strotöra aposta de lëgn y implida de tera por ti dé plü stabilité ala costruziun de proteziun. L’obietif dl intervënt é da archité sö la smöia por evité danns ala strada comunala che porta a Plans. I laurs sot ala direziun de Heinz Baumgartner é gnüs stlüc jö d’isté. Al é gnü investí te chësc proiet lauré fora da Caterina Ghiraldo indöt 120.000 euro.

Comun de Badia: ressanamënt dla proteziun paralovines pro la fraziun Verda

D’atri laurs de sistemaziun de prescia é ince gnüs fac sura le Hotel Cristallo tles vijinanzes dla fraziun Verda tl Comun de Badia. Al é gnü mudé fora na seria de strotöres de proteziun da lovines che é gnüdes metüdes sö ti agn '90 y che é gnüdes danajades dala tempesta Vaia ala fin de otober dl 2018. Dan le scomenciamënt di laurs á la Repartiziun Bosc fat sö na strada d’azes nöia. La costruziun dles rëis de proteziun da lovines á metü man da d’isté dl ann passé. L’investimënt é de indöt 570.000 euro. La direziun di laurs é de Michael Baumgartner dl Ofize Sistemaziun rüs da munt dl'Agenzia por la Proteziun zivila.


Clican chiló röiun ala verjiun originala dl comunicat stampa por visualisé imajes, documënc o video che taca lapró

USP/mac/fg