News

Scora ladina: Dis dla sanité por passa 140 mitans y mituns

Le Referat Educaziun ala sanité y mobilité dl’Intendënza ladina á metü a jí i dis dla sanité por les scolares y i scolars por sensibilisé sön l’importanza di aspec desvalis che reverda la sanité.

Movimënt, sozialisaziun, sessualité, respiraziun y alimentaziun é stades n valgönes dles tematiches prinzipales di Dis dla Sanité organisá dal Referat por l’Educaziun ala sanité y mobilite´ en colaboraziun cun le Referat por l’Educaziun interculturala, Magdalena Lerchegger. L'ediziun 2021 é gnüda organisada tla scora mesana da La Ila. Indöt él gnü organisé trëi workshop desvalis por indöt passa 140  scolares y scolars. Por l’assessur por la scora ladina Daniel Alfreider é la formaziun di ciamps dla sanité de gran importanza por le svilup dles scolares y di scolars. Le fin di Dis dla sanité é por l’intendënta Edith Ploner dantadöt da ti dé inant ales mitans y ai mituns informaziuns importantes sön tematiches importantes sciöche le bëgnester fisich y psicich y che adora formes y tëmps de formaziun aposta.

140 scolars y scolars á tut pert ai Dis dla sanité

I workshops é gnüs organisá dal colaboradú Emanuel Gravino. Ai é gnüs partis sö aladô de tematiches desvalies. Tratan la pröma incuntada de formaziun él gnü traté les tematiches dl movimënt y dla sozialisaziun, dl’educaziun sessuala y dles erbes y dl’alimentaziun. Tratan la secunda scomenciadia de formaziun él gnü tematisé le movimënt y la sozialisaziun, yoga y la respiraziun y i comportamënc a risch che reverda le monn dles dependënzes. La terza incuntada di Dis dla sanité á albü tl zënter n curs da balé, mosöres de pröm aiüt por l’anima y le movimënt y la sozialisaziun.

Feedback positif: Planificaziun por le dagní

Al á tut pert scolars y scolars dala pröma ala terza classa dla scora mesana da La Ila. I cursc é gnüs tignis da Lorenz Clara, Valentin Erlacher, Helga Alton, Alessio Vettorello, Gabriel Prada, Sara Clara, Lois Kastlunger, Eveline Vinatzer y Emanuel Gravino. Do la buna garatada di Dis dla sanité y le feedback positif da pert dles scolares y di scolars él i responsabls che planifichëia da organisé i Dis dla sanité danü ti proscims agn a rotaziun por les atres mesanes dles döes valades ladines.




Clican chiló röiun ala verjiun originala dl comunicat stampa por visualisé imajes, documënc o video che taca lapró